عثمان ساهلي- الكذب و النفاق وداكشي

عثمان ساهلي- الكذب و النفاق وداكشي

ماشي كلشي كيكدب وماشي كلشي كيقول الحق. لي كيكدب راه كتلقاه ديما كيكدب و قليل فين كيقول الحق ولي ديما كيقول الحق كتلقاه قليل فين كيكدب ربما الظروف لي خلاتو يكدب. المهم ضروري متلقا الكدوب في بنادم حيت حنا بشر ماشي ملائكة .

  وكاين لي مبليين بالكدوب الله يستر كتلقا شي بنت كتهدر مع صحاباتها: “شفتو هاد لبسة جابها ليا حبيبي من هولندا” . وهي كتلقاها شراتها غي من شي بوتيك . كتلقا طوطال ديالها لابسة 300dh من راسها حتى لرجليها وملي تسولها على سبرديلا تقولك شريتها ب 500dh ويلا حققتي مزيان فدااك سبرديلا غادي تباليك كولا سبيسيال خارجا كتسارى مع جناب.

  وكاين شي دراري غي كيتلاقا مع شي بنت وكيلقاها زوينة و كيبدا عليها عرفتي راني هاد العام خديت الاجازة ديالي والعام جاي غادي نبدا فالماستر و هو كتلقاه خرج من تاسعة وخدام في شركة لاڤاش كيري .

  و مع البنات حتى هما عزيز عليهم لي كيكدب حيت الدري ملي كيبقا يكدب عليها و يزيد يكدب كتحس هي بالسعادة معاه علاش؟ حيت داك الدري عارف راسو مغديش تقبل عليه إلى واجهها بالحقيقة داكشي علاش كيخليها عايشة فالخيال و كيفما كنعارفو بأن الخيال واسع ولكم أن تتخيلو ما تشائون ✌ داكشي علاش كتلقاها كتحس معاه بسعادة لا منتهية لكن النهاية غالبا كتكون شوية قاصحة حيت كتلقا البنت عندها آمال بناتهم على داك الخيال مع الأسف وكاين عوتاني أصحاب الوجوه الكثيرة.

  كيجيك بوجه المحبة والمعزة وغي كتعطيه بالظهر كيكون هو أول واحد كيخرج فيك العيب . كتشوف مثلاً شي جوج بنات كيهدرو مع بعضياتهم: “أهلا حبيبة توحشتك كتقولها حتى أنا أكبيدة لهلا يوريك شحال توحشتك وشحال يبوسو فبعضياتهم” و ملي كيتفرقو كتلقاها كتهدر ليها فظهرها مع صحاباتها: “ويلي يا البنات عرفتو شكون تلاقيت اليوم هاديك المسمومة ديال حنان بنت الحرام هاديك راه عينيها فصاحبي” . أودي العفووو منكم قالت ليك عينيها فصاحبي وكتلقا هاد صاحبها داير بحالها وئام .

  الدري فاش كيبغي يولي عزيز على شي بنت كيستعمل جوج منهجيات ديال النفاق: – المنهجية الأولى: كيدير راسو بأنه “البطل والضحية” البطل فشي حوايج مغديش يقدر عليهم وكيبين ليها بأنه قادر يديرهم و يفوتهم. وضحية فشي حوايج قادر عليهم وكيبين ليها العكس أنه مقادرش يديرهم باش يكسب العطف ديالها ♥ المنهجية الثانية: كيفما كنعرفو بأن البنت حنونة فطبعها لأنها هي الأم ♡ داكشي علاش ملي كيجي الدري يعاود ليها كتسمعلو وكتعطيه وقت. لكن هو كيستاغل هاد الوقت وكيبقا يعاود ليها شي مشاكل مكينينش . حيت كيقولو والله أعلم أنك لا بقيتي كتعاود لشي بنت ديما مشاكلك و أي حاجة وقعات ليك كتولي عندها عزيز وتقدر حتى هي تبقى تعاودليك أي حاجة وتأمنك على أسرارها.

  داكشي علاش خصك تكوني عايقة وفايقة وفاهمة و واعية و متخليش ولد القاف يديرها بيك . ونفس الشيء بالنسبة حتى للدراري لكن الأمر كيختالف؛ حيت البنت ملي كتبغي تقرب من شي واحد مكتعاودليه مكتهدر معاه. لكن كتجمع عليه شي دوسي يكون هو هداك كتبقى تسول هدا وتسول هاديك شنو كتعرفي عليه و كيف جاك واش مصاحب ولا لا المهم كتجمع دوسي مكمول وكتلقاها حاضياه غا من بعيد و كتقرى Les Statuts ديالو و حتى. ونهار كيبان ليها بأنه معقول عاد كتقولو السلام بحالا زعما هي مكتعرفوش گاع . هدشي إلى كان بصح معقول.

  أما دبا الأغلبية لا الدراري ولا البنات كتكوَّن عليها صورة لكن غالبا داك الصورة كطلع عكس داك صورة لي كونتيها حيت كلشي كيتقلَّب إلا الراس ديال بنادم عمرك تعرف شنو فيه. لأنه وبكل بساطة ماشي أي واحد سولتيه على فلان غادي يقوليك راه مزيان ولاخايب حيت كاين لي غادي يقولك الصراحة وكاين لي غيكدب عليك . داكشي علاش الكدوب والنفاق رجعو عايشين معانا وهما لي كيخليونا نفقدو الثقة فبنادم.

loading...
2015-08-01 2015-08-01

عذراً التعليقات مغلقة

زاوية التعليقات هي جزء مكمّل للموضوع الذي قرأته للتو. حاول أن تحصر تعليقك في صلب الموضوع حتى نستثمر هذا التعليق لكسب المزيد من الفائدة سواءً عن طريق مناقشة الموضوع أو عن طريق إضافة معلومات مكمّلة أو إبداء ملاحظات أخرى في نفس السياق.

عذراً التعليقات مغلقة

حسيمة سيتي